काठमाडौं । सेवाग्राहीसँग घुस लिएको आरोप लागेका झापाको बुद्ध शान्ति गाउँपालिका २ का वडाध्यक्ष डिल्लीप्रसाद ओली निलम्बनमा परेका छन् । ८० हजार रुपैयाँ घुस लिइएको अवस्थामा उनी मंगलवार पक्राउ परेका थिए ।
वडाध्यक्ष ओलीलाई नेत्रविक्रम चन्द विप्लव नेतृत्वको नेपाल कम्युनिस्ट पार्टीका कार्यकर्ताले घुससहित नियन्त्रणमा लिइ इलाका प्रहरी कार्यालय, अनारमनिमा लगेर बुझाएका थिए ।
त्यसपछि अख्तियार अनुसन्धान दुरुपयोग आयोगलाई खबर गरिएको थियो । अख्तियारले बिहीवार बुद्ध शान्ति गाउँपालिकालाई पत्र लेख्दै उनलाई निलम्बन गरिएको जनाएको छ ।
वडाध्यक्ष ओलीले आफूसँग घुस मागेपछि अमरनाथ चौहानले आफूहरू खबर गरेको नेकपा झापाका नेता अर्जुन ‘सी’ले बताए । त्यसपछि उनलाई ८० हजार घुससहित पक्राउ गरेर अख्तियारमा बुझाइएको उनको भनाइ छ ।
वडाध्यक्ष ओलीले डेढ लाख रुपैयाँ मागेको र अख्तियारमा बुझाउँदा सबै पैसा सरकारको खातामा जम्मा हुने भएपछि ८० हजार मात्रै दिन लगाएर पक्राउ गरिएको अर्जुनको भनाइ छ ।
अम्बरनाथ भारतको सिलगुडीमा बस्ने गर्थे । उनले गाउँका पण्डित चतुर्भुज घिमिरेको नाममा जग्गा किन्न २३ लाख रुपैयाँ पठाइदिएका थिए । अम्बरनाथसँग नेपाली नागरिकता नभएपछि उनले चतुर्भुजलाई पैसा पठाइदिएका हुन् । जग्गाकै विषयलाई लिएर दुई जनाबीच विवाद भएपछि उनीहरू वडा कार्यालयसम्म पुगेका थिए ।
विवाद मिलाउन भनेर वडाध्यक्ष ओलीले पटक–पटक पैसा मागेपछि मंगलवार उनलाई पक्राउ गरी अख्तियारको जिम्मा लगाइएको हो ।
