फाइल तस्बिर
काठमाडौं । पाँचथरका आइतराज केरुङको घर नजिकै अर्को पनि विस्फोटक पदार्थ फेला परेको छ । नेपाली सेनाको डिस्पोजल टोलीले विस्फोटक पदार्थ फेला पारेको हो ।
भेटिएको विस्फोटक पदार्थ टोलीले डिस्पोज गर्ने तयारी थालेको पाँचथर प्रहरी प्रमुख हेमन्त भण्डारीले जानकारी दिए । भेटिएको वस्तु ग्रिनेड वा बम हुन सक्ने प्रहरीको अनुमान छ ।
बिहीबार दिउँसो ३ बजे विस्फोटक पदार्थ पकिँड्दा दुई बालबालिकाको ज्यान गएको छ । विस्फोटक पदार्थ पड्किँदा घाइते भएका दिप्सन साँवा र प्रियंशा साँवाको उपचारका क्रममा मृत्यु भएको हो । मृत्यु भएका बालबालिका एकै घरका दाजुबिहिनी हुन् ।
बिहीबार केरुङको घरमा विस्फोटक पदार्थ पड्किँदा उनीहरू घाइते भएका थिए । केरुङ भने सदरमुकाम फिदिममा बस्ने गरेका छन् । उनको घरमा ज्ञानुराज राई बस्ने गरेको प्रहरीले जनाएको छ । घर नजिकै उक्त वस्तु फेला परेको प्रहरीले जनाएको छ ।
दिप्सनको इलाम अस्पताल र प्रियंशाको बीएन्डसी अस्पताल बिर्तामोडमा उपचारका क्रममा मृत्यु भएको पाँचथर प्रहरी प्रमुख भण्डारीले जानकारी दिए ।
