काठमाडौं । प्रधानमन्त्री पुष्पकमल दाहाल ‘प्रचण्ड’ले प्रमुख प्रतिपक्षी दल नेपाली कांग्रेसलाई छलफलमा बोलाएका छन् । प्रधानमन्त्रीले बेलुका ६ बजे छलफल गर्ने गरी कांग्रेस नेताहरूलाई छलफलमा बोलाएका हुन् ।
संसदको अवरोध खुलाउन सभामुख र प्रधानमन्त्रीले छलफल गरिरहेका छन् । तर, सहमति नहुँदा बैठक बस्न सकेको छैन । बिहीबारको बैठकमा धकेलाधकेल भएपछि नेताहरूले छलफलाई तीव्र बनाएका छन् ।
सभामुखले प्रमुख सचेतक र सचेतकहरूको छलफल बोलाएका थिए । तर, प्रतिपक्षी दलहरूले संसदीय समिति गठन नभएसम्म बैठक चल्न नसक्ने अडान राखेका थिए । त्यसलगत्तै प्रधानमन्त्रीले कांग्रेसलाई छलफलमा बोलाएका हुन् ।
नेपाली कांग्रेसले सहकारीको रकम घोटालामा उपप्रधानमन्त्री तथा गृहमन्त्री रवि लामिछानेमाथि छलफल हुनुपर्ने माग गर्दै आएको छ । तर, सत्ता पक्ष त्यसमा सहमत नहुँदा सदनको बैठक प्रभावित हुँदै आएको छ । आजै प्रतिपक्षीहरू कांग्रेसको यो मागमा एकजुट भएका छन् ।
