काठमाडौं । प्रमुख प्रतिपक्षी दल नेपाली कांग्रेसले सभामुख देवराज घिमिरेले सदनमा मुठमेड निम्त्याएर आफ्नो भूमिकामा चुकेको ठहर गरेको छ । संसद्को बैठकमै सत्तापक्ष र प्रतिपक्षीबीच मुठभेडको अवस्था निम्त्याउन सभामुख जबरजस्ती कारण बनेको बताएको छ ।
सदनको बैठक सकिएपछि आयोजना गरिएको पत्रकार सम्मेलनमा नेपाली कांग्रेसका महामन्त्री गगन थापाले सभामुखले पूर्वदलको रुझान त्याग्न नसकेको आरोप लगाए । “आज सदनमा जे दृश्य देखियो । सभामुखले सदनको जुन भूमिका निर्वाह गर्नुभयो, त्यसमा सर्वथा चुक्नुभएको हाम्रो ठहर छ,” महामन्त्री थापाले भने, “सदनमा सत्तापक्ष र प्रतिपक्षबीच कुरा मिल्दैन । त्यस्तो अवस्थामा पुरानो दलको रुझानबाट मुक्त संसद्को अभिभावकका रूपमा सभामुखको भूमिका अपेक्षित हुन्छ । तर सभामुख आफ्नो भूमिकामा चुक्नुभएको हाम्रो ठहर हो ।”
उनले संसद्को वेलमा पुगिसेकेको र विरोध गरिरहेको अवस्थामा सत्तापक्षका तीन दलका बैठकबाट जे निर्देशन आएको थियो त्यही रूपमा सभामुखले बैठक सञ्चालन गरेको आरोप लगाए ।
