काठमाडौं । एक महिनाको अवधिमा सुनको मूल्य प्रतितोला ७ हजार ३०० रुपैयाँले बढेको छ । नेपाल सुनचाँदी व्यवसायी महासंघका अनुसार फागुन महिनाको १ गतेदेखि ३० गतेसम्मको अवधिमा सुनको मूल्य प्रतितोला ७ हजार ३०० रुपैयाँले बढेको हो ।
यो महिनाको १ गते छापावाल सुनको मूल्य तोलामा १ लाख १७ हजार रुपैयाँ थियो । जुन, आज ३० गते १ लाख २५ हजार रुपैयाँ कायम भएर कारोबारमा आएको सुनचाँदी व्यवसायी महासंघले जनाएको छ । यस्तै, १ गते तोलामा १ लाख १७ हजार १५० रहेको तेजाबी सुनको मूल्य आज १ लाख २४ हजार ४०० रुपैयाँ कायम छ ।
यो महिना नेपाली बजारमा सुनको मूल्यले कीर्तिमान नै कायम गर्यो । फागुन २७ गते सुनको मूल्य तोलामा १ लाख २६ हजार रुपैयाँ पुगेको थियो । यो मूल्य तीन दिनसम्म स्थिर कायम भयो । नेपाली बजारमा अहिलेसम्म सुनको मूल्य प्रतितोला १ लाख २६ हजार रुपैयाँ पुगेको थिएन ।
यस्तै, यो महिना चाँदीको मूल्य ७० रुपैयाँले बढेको छ । महिनाको सुरुवातमा १३ सय ९५ रुपैयाँ कायम चाँदीको मूल्य अन्तिममा १४ सय ६५ रुपैयाँ कायम हुँदै कारोबार भइरहेको छ ।
