काठमाडौं । राष्ट्रियसभा अध्यक्ष पदका लागि मंगलबार निर्वाचन हुँदैछ । आज बिहान ११ बजेर ९ मिनेटमा बस्ने गरी बोलाइएको राष्ट्रियसभा बैठकमा अध्यक्षको चयन प्रक्रिया अघि बढ्ने जनाइएको छ ।
राष्ट्रियसभाको अध्यक्षका लागि सत्तापक्ष र प्रतिपक्ष गरी दुई प्रमुख राजनीतिक दल नेकपा माओवादी केन्द्र र नेपाली कांग्रेसका तर्फबाट दुई जना प्रतिस्पर्धामा छन् । आज हुने निर्वाचनमा प्रतिपक्षी कांग्रेसका तर्फबाट युवराज शर्मा र सत्ता गठबन्धनका तर्फबाट माओवादीका नारायणप्रसाद दाहाल चुनावी मैदानमा छन् ।
कांग्रेसलाई लोकतान्त्रिक समाजवादी पार्टी (लोसपा)ले साथ दिएको छ भने दाहाललाई सत्ता गठबन्धनमा रहेका माओवादीसहित एमाले, जसपा र एकीकृत समाजवादीको समर्थन रहेको छ ।
५९ सदस्यीय राष्ट्रियसभामा दाहाललाई माओवादीका उपाध्यक्षसहित १८, एमालेका १०, एकीकृत समाजवादीका ८ र जसपाका ३ गरी ३९ सांसदको समर्थन छ ।
यस्तै, शर्मालाई कांग्रेसका १६, लोसपा र राष्ट्रिय जनमोर्चाका एक एक गरी १८ सांसदको साथ छ ।
राष्ट्रियसभामा राष्ट्रपतिबाट मनोनीत बामदेव गौतम कतै खुलेका छैनन् । एक पद भने राष्ट्रपतिबाट मनोनीत हुन बाँकी छ । सिट र सिट भएका दलको समर्थनको आधारमा हेर्ने हो भने आजको निर्वाचनमा दाहालले बाजी मार्नसक्ने संभावन प्रवल रहेको आँकलन गर्न सकिन्छ ।
