काठमाडौं । साउन्ड इन्जिनियर्ससँगको विवादपछि साउन्ड व्यवसायीहरूले गायिका एलिना चौहान सहभागी हुने कार्यक्रमका लागि साउन्ड सिस्टम उपलब्ध नगराउने चेतावनी दिएपछि एलिनाले आफ्नो कमजोरी स्वीकार गरेकी छिन् ।
गत हप्ता पर्वतमा भएको कार्यक्रममा गायिका एलिना र साउन्ड इन्जिनियर्सबीच विवाद भएको थियो । सो विवादपछि साउन्ड सिस्टम व्यवसायीहरूले एलिनालाई बहिस्कार गर्ने चेतावनी दिएका थिए ।
व्यवसायीको चेतावनीपछि शनिबार फेसबुकमा स्टाटस लेख्दै एलिनाले आफ्नो कमजोरी स्वीकार गरेकी हुन् । उनले भनेकी छिन्, ‘गत हप्ता पर्वतको एउटा सांगीतिक कार्यक्रममा प्रस्तुतीका लागि पुग्दा त्यहाँ एउटा आकस्मिक घटना हुन पुग्यो, जुन नहुनुपर्ने थियो । सो घटनामा तत्कालीन समयमा म आवश्यकताभन्दा बढी प्रतिकारात्मक देखिन पुगेका प्रति आत्मालोचना गर्दछु ।’
