काठमाडौं । क्यानडाविरुद्धको एकदिवसीय शृंखलाको अन्तिम खेलमा नेपालका ओपनर अनिलकुमार साहले अर्धशतक बनाएका छन् ।
सोमबार कीर्तिपुरस्थित त्रिवि क्रिकेट मैदानमा क्यानडाले दिएको २३३ रनको लक्ष्य पछ्याइरहेको नेपालबाट अनिलले ५१ बलमा आठ चौकासहित ५० रन पूरा गरेका हुन् ।
सन् २०२२ पछि राष्ट्रिय टिममा पुनरागमन गरेको अनिलको यो दोस्रो एकदिवसीय अन्तर्राष्ट्रिय अर्धशतक हो । यसअघि अनिलले यही शृंखलाको दोस्रो खेलमा पहिलो एकदिवसीय अन्तर्राष्ट्रिय अर्धशतक प्रहार गरेका थिए ।
जारी खेलको १६ आभेर समाप्त हुँदा नेपालले एक विकेट गुमाएर ८९ रन बनाएको छ । नेपालबाट हाल क्रिजमा रहेका अनिल ५१ र भीम सार्की १८ रनमा खेलिरहेका छन् । त्यसअघि नेपाली टिमको खातामा अर्का ओपनर कुशल भुर्तेलले १३ रन थपेका थिए । त्यसअघि टस हारेर ब्याटिङमा आएको क्यानडाले निर्धारित ५० ओभरमा आठ विकेट गुमाएर २३२ रनको योगफल खडा गरेको थियो ।
