काठमाडौं । इमेज बचत तथा ऋण सहकारी संस्थाका संस्थापक अध्यक्ष देवुकमार नेपालीले आफ्नो सम्पूर्ण सम्पत्ति सहकारी पीडितलाई दिने बताएका छन् ।
माघ १९ अपिल सार्वजनिक गर्दै आफू र आफ्नो श्रीमती छेला नेपालीको नाममा रहेको सम्पूर्ण सम्पत्ति सहकारी पीडितको नाममा गरिदिने बताएका हुन् ।
बचतकर्ताको करिब २ अर्ब रुपैयाँ हिनामिना गरि २०८० जेठ ५ गते देवुकमार नेपाली परिवारसहित फरार भएका नेपालीले मंसिर ५ गते सामाजिक सञ्जालमार्फत पीडितहरुको बचत फिर्ता गर्न आफू छिटै सार्वजनिक हुने बताएका थिए ।
पछिलो पटक सार्वजनिक गरिएको प्रतिवद्धता अनुसार नेपालीले आफू र आफ्नो नाममा रहेको घर जग्गाहरु सहकारीका बचतकर्ताहरुले जम्मा गरेको रकम, बैंकको ऋण र आफ्नो निजी सम्पत्ती समेतबाट खरिद गरेको बताएका छन् । .
नेपालीले आफु र आफ्नो नाममा रहेको सम्पूर्ण सम्पत्ती सहकारीका पीडितहरुलाई हस्तान्तरण गर्न तयार रहेको भन्दै सहज वातावरण सिर्जना गरिदिन सबै सरोकारवालाहरुसँग आग्रह गरेका छन् ।
पीडितहरुलाई सम्बोधन गर्दै नेपालीले भने, ‘यहाँहरु जस्तै हामी पनि समस्याको समाधान गर्न चाहन्छौ । हाम्रो नियतका कारण होइन, वित्तीय क्षेत्रमा आएको संकटका कारण सहकारीमा समस्या आएको हो । सहकारीमा आएको समस्याका कारण हाम्रो नियतमा समेत शंका उत्पन्न भएको छ । सहकारीमा बचत गरेका सदस्यहरुको बचत रकम फिर्ता गर्ने कुरामा आज पनि हामी उत्तिकै प्रतिवद्धछौँ, संवेदनशील छौँ ।’
६ महिनाभित्रमा सबै समस्या समाधान गर्न सक्छौ भन्ने सोचेर काम गरेका थियौँ तर समय र परिस्थिति हाम्रो अनुकुल हुन सकेन । अहिलेको परिस्थिति हाम्रो नियन्त्रणमा छैन । पीडित सदस्य बचतकर्ताहरु, सहकारी विभाग र सहकारी रजिष्ट्रार कार्यालय, प्रहरी प्रशासन र अदालत समेत यो विषयसंग प्रत्यक्ष जोडिएको अवस्था छ । यस्तो अवस्थामा समस्याको समाधान कसरी गर्न सकिन्छ भन्ने विषयमा सबैले गम्भीरताका साथ मनन गर्नु हुनेछ भन्ने हामीले अपेक्षा गरेका छौँ, नेपालीले जारी गरेको अपिलमा उल्लेख छ ।
