काठमडौं । नेपाली कांग्रेसले केन्द्रीय कार्यसम्पादन समिति बैठक बोलाएको छ। मुख्यसचिव कृष्णप्रसाद पौडेलका अनुसार यही पुस २१ गते शनिबार दिउँसो १ बजे केन्द्रीय कार्यालय सानेपामा बस्ने गरी बैठक बोलाइएको हो।
राष्ट्रिय सभा चुनावलगायत विषयमा छलफल गर्न कांग्रेसले बैठक बोलाएको हो। सिट बाँडफाँटलगायत विषयमा सत्ता गठबन्धनमा केही दिनदेखि निरन्तर बैठक भइरहेका छन्।
पार्टीभित्र छलफलबिनै सभापति शेरबहादुर देउवालगायत नेताहरू गठबन्धन बैठकमा गइरहेको विषयमा पार्टीभित्रैबाट असन्तुष्टि देखिएको थियो।
माघ ११ गते हुने चुनावका लागि यही पुस २३ गते मनोनयन दर्ताको कार्यक्रम छ। कांग्रेसले पुस १२ देखि १४ गतेसम्म चलेको केन्द्रीय समिति बैठकबाट राष्ट्रिय सभा चुनावमा सत्ता गठबन्धनबीच साझा उम्मेदवार तय गरेर जाने निर्णय गरेको थियो।
