हेटौंडा । मोटरसाइकलको ठक्करबाट हेटौंडामा एकजना प्रहरीको मृत्यु भएको छ । यस्तै, दुर्घटनामा दुईजना प्रहरीसहित मोटरसाइकल चालक घाइते भएका छन् ।
बुधबार बिहान हेटौंडा–नवलपुर सडक खण्डअन्तर्गत थानाभर्याङ क्षेत्रमा फिजिकल ट्रेनिङको लागि दौडिरहेको प्रहरीको टोलीमाथि मोटरसाइकलले ठक्कर दिएको थियो ।
हेटौंडाबाट नवलपुर जाँदै गरेको ना ४ प २२२ नम्बरको मोटरसाइकल ठक्करबाट दौडिरहेका प्रहरी जवान डडेल्धुरा अलिताल गाउँपालिका–६ का २५ वर्षीय विनोद ऐडीलाई ठक्कर दिएको थियो ।
ठक्करबाट गम्भीर घाइते भएका ऐडीको उपचारको क्रममा हेटौंडा अस्पतालमा मृत्यु भएको जिल्ला प्रहरी कार्यालय मकवानपुरले जनाएको छ ।
दुर्घटनामा प्रहरी जवान नवराज सार्की र प्रहरी जवान विजय खत्री घाइते भएका छन् । मृतक र घाइते तिनै जना बागमती प्रदेश प्रहरी गणमा कार्यरत थिए ।
अर्का घाइते मोटरसाइकल चालक हेटौंडा–४ का ४१ वर्षीय गणेश लामालाई थप उपचारको लागि चितवन पठाइएको छ ।
