काठमाडौं । चार्जिङमा राखिएको एमजी मोटर्सको कारमा आगलागी भएको छ । एमजी मोटर्सको विद्युतीय कार जेडएम ईभीमा चार्जिङ राखिरहेको अवस्थामा आगलागी भएको हो ।
यो घटना पुस ९ गते काठमाडौंको बुढानीलकण्ठ नगरपालिका देउवा चोक नजिकै भएको हो । बागमती प्रदेश ०१ ०२७ च १५८१ नम्बरको उक्त गाडी खाली चौरमा पार्किङ गरिएको थियो ।
पार्किङका क्रममा चार्जमा लगाइएको उक्त गाडी खुला स्थानमा रहेकाले अन्य धनजनको क्षति हुन नपाएको काठमाडौंको प्रहरी प्रभाग बुढानीलकण्ठका इन्सपेक्टर योगराज खतिवडाले बताए । प्रहरी मुचुल्कामा चार्जिङका क्रममा मध्यराति १ बजेको समयमा गाडीमा आगलागी भएको उल्लेख छ । तर त्यसको यकिन कारण भने अहिलेसम्म खुल्न सकेको छैन ।
गाडी धनी गोरखाका सुदीप लामिछाने रहेको बताइएको छ । प्रहरीका अनुसार आफन्तको घरमा आएका बेला चार्जिङका क्रममा गाडीमा आगलागी भएको हो । घटनाबारे थप अनुसन्धान भइरहेको प्रहरीले जनाएको छ ।
तस्बिर : टेकपाना
