काठमाडौं । चिनियाँ टेक तथा मोबाइल निर्माता कम्पनी साओमीले पहिलो इलेक्ट्रिक कार लन्च गरेको छ। बिहीबार कम्पनीले उक्त इलेक्ट्रिक एसयुसेभेन मोडल सार्वजनिक गरेको हो।
कम्पनीले एसयुसेभेनमा ७३.६ किलोवाट आवर (युनिट) क्षमताको ब्याट्री प्याक राखेको जनाएको छ। यसले एक पटकको फुल चार्जमा ८०० किलोमिटर दुरी पार गर्न सक्ने रेन्ज प्रदान गर्छ। यस्तै यही मोडलमा अर्को १०० किलोवाट आवरको ब्याट्री प्याक पनि यसमा उपलब्ध छ। जसले एक पटकको फुल चार्जमा ८०० किलोमिटर रेन्ज प्रदान गर्ने कम्पनीले जनाएको छ।
यसैगरी सबैभन्दा ठूलो १५० किलोवाट आवरको ब्याट्री प्याक पनि यसमा उपलब्ध छ। जसले एक पटकको फुल चार्जमा १२०० किलोमिटर रेन्ज प्रदान गर्छ। यो गाडी टेस्लाको मोडल एस जस्तै लुक्समा डिजाइन गरिएको छ।
साओमीले एसयुसेभेनको निर्माण गर्न बेजिङमा आधारित बस निर्माता कम्पनी बायक ग्रुपसँग सहकार्य गरेको छ। यसबाट कम्पनीले वार्षिक २ लाख कार उत्पादन गर्ने योजना बनाएको छ। कम्पनीले यो कारलाई २०२५ सम्म बजारमा बिक्री गर्ने योजनामा छ। कम्पनीले यसलाई सेल टु बडी प्रविधिमा विकास गरेको छ।
यो एसयुसेभेन ४ हजार ९९७ एमएम लामो छ भने १ हजार४५५ एमएम उचाइको छ। यसमा ३००० एमएमको ह्वीलबेस रहेको छ। यसमा भएको मोटर पावरले २६५ हर्सपावरदेखि भेरियन्ट अनुसार ३७४ हर्सपावर प्रदान गर्न सक्छ। साथै ६३५ एनएम टर्क उत्पादन गर्न सक्छ।
