काठमाडौं । ग्लोबल आइएमई बैंक वित्तीय संस्थामध्ये सबैभन्दा बढी आयकर दाखिला गर्ने बैंक बनेको छ । बैंकले आर्थिक वर्ष २०७८/७९ मा तीन अर्ब २० करोड रुपैयाँ कर दाखिला गरेको थियो ।
आन्तरिक राजस्व कार्यालयद्वारा राष्ट्रिय कर दिवस, २०८० का अवसरमा आयोजित कर सप्ताह समापन समारोहमा बैंक तथा वित्तीय संस्थाअन्तर्गत सर्वाधिक कर तिर्ने ग्लोबल आइएमईलाई सम्मान गरिएको हो ।
कार्यक्रममा अर्थमन्त्री डा. प्रकाशशरण महतले ग्लोबल आइएमईका अध्यक्ष चन्द्रप्रसाद ढकाललाई सर्वाधिक कर दाखिलाको कदरस्वरूप सम्मानपत्र प्रदान गरे ।
ग्लोबल आइएमई विभिन्न सूचकमा नेपालको सबैभन्दा ठूलो बैंकका रूपमा स्थापित छ । हाल बैंकको चुक्ता पुँजी ३५ अर्ब ७७ करोड रुपैयाँ छ ।
सन् २००७ मा ग्लोबल आइएमईले वाणिज्य बैंकका रूपमा बैंकिङ कारोबार थालेको थियो । ग्लोबल आइएमई मुलुकका ७७ जिल्लामा शाखा सञ्जाल रहेको निजी क्षेत्रको पहिलो वाणिज्य बैंक हो ।
बैंकले ३५० शाखा, ३६९ एटीएम, ३२२ शाखारहित बैंकिङ सेवा, ६६ एक्सटेन्सन एवं राजस्व संकलन काउन्टर र तीन वैदेशिक प्रतिनिधि कार्यालय समेत गरी एक हजार १०० भन्दा बढी सेवा केन्द्रबाट सेवा प्रदान गरिरहेको जनाइएको छ ।
