एजेन्सी। भारतको उत्तराखण्ड राज्यको उत्तरकाशी जिल्लामा तीन दिनदेखि सुरुङमा फसेका ४० मजदुरलाई अझै उद्धार गर्न सकिएको छैन । उनीहरुको उद्धारका लागि गरिएका अहिलेसम्मका प्रयास विफल भएका छन् ।
सुरुङमा पुरिएको माटोको ढिस्को खसेपछि उनीहरु थुनिएका छन् । मंगलबार ड्रिल गर्ने मेसिन लगिएकोमा उक्त मेसिनमा प्राविधिक खराबी आएपछि उद्धारमा कठिनाइ भएको हो ।
उद्धारमा संलग्न अधिकारीहरुका अनुसार अब दिल्लीबाट अर्को मेसिन ल्याएर उद्धार कार्यलाई निरन्तरता दिने तयारी छ । सुरुङमा फसेका सबै मजदुर अहिलेसम्म सकुशल रहेको बताइएको छ । उनीहरुलाई ट्युबका माध्यमबाट भोजन तथा पानीको व्यवस्था गरिएको छ ।
ब्रह्मखाल–यमुनोत्री राष्ट्रिय राजमार्ग अन्तर्गत सिल्क्यारा र डंडालगाउँबिच बनाइएको सुरुङको एउटा भाग आइतबार बिहान पुरिएको हो । साढे चार किलोमिटर लामो सुरुङ माटो खसेर पुरिँदा भित्र काम गरिरहेका मजदुर थुनिएका हुन् ।
