काठमाडौं । विश्वकपमा छनोट भएको नेपाली क्रिकेट टोलीले आज ओमनसँग प्रतिस्पर्धा गर्दैछ। कीर्तिपुरस्थित टीयू क्रिकेट मैदानमा टी २० विश्वकप छनोट अन्तर्गतको फाइनल खेलमा यी दुई टोली आमनेसामने हुनेछन्।
विश्वकप छनोटको सेमिफाइनल खेलमा नेपालले यूएईलाई र ओमनले बहराइनलाई हराएर दुवै टोलीले विश्वकपमा स्थान पक्का गरेका थिए।
त्यसअघि यी दुई टोली समूह चरणमा पनि एकसाथ थिए। समूह ‘ए’ मा ओमन, नेपाल, मलेसिया र सिंगापुरले प्रतिस्पर्धा गरेका थिए। जसमा ओमन विजेता र नेपाल उपविजेता बन्दै सेमिफाइनल प्रवेश गरेका थिए।
यी दुई टोलीबीचको पछिल्ला पाँच खेलमा ओमनले २ पटक र नेपालले ३ पटक जित निकालेका छन्।
नेपाल क्रिकेट संघ (क्यान)ले शनिबार विज्ञप्ति निकाल्दै नेपाल र ओमानबीच हुने आइसीसी टी२० विश्वकप अन्तर्गतको खेलको टिकट बिक्रीबाट उठ्ने ५० प्रतिशत रकम भूकम्पपीडितलाई सहयोग गर्ने घोषणा गरेको थियो।
