काठमाडौं । प्रधानमन्त्री पुष्पकमल दाहाल ‘प्रचण्ड’ले नेपाल एयरलाइन्सलाई रुकुम पश्चिमको चौरजहारीलाई केन्द्रित गरेर हवाई उडान गर्न र अन्य एयरलाइन्सहरूलाई स्ट्याण्डबाई अवस्थामा रहन निर्देशन दिएका छन् ।
रुकुम पश्चिम र जाजरकोटका भूकम्प प्रभावितहरूको राहत तथा उद्धारका लागि सहज होस् भन्ने हेतुले रुकुमलाई केन्द्रित गरेर हवाई उडान गर्न प्रधानमन्त्री प्रचण्डले निर्देशन दिएका हुन् ।
अन्तको उडान स्थगित गरेर भए पनि रुकुमलाई केन्द्रित गरेर हवाई उडान गर्न नेपाल एयरलाइन्सलाई निर्देशन दिएको प्रधानमन्त्री सचिवालयका अधिकारीले बताएका छन् ।
रुकुम पश्चिमको चौरजहारी र खलङ्गास्थित एयरपोर्टहरूमा साना ट्विनअटर हवाईजहाज उडान भरिँदै आएको छ । तर जाजरकोटमा भने एयरपोर्ट भए पनि सञ्चालनमा छैन ।
प्रधानमन्त्री प्रचण्ड आज बिहानै नेपाली सेनाको मेडिकल टिमसहित हेलिकोप्टरमार्फत रुकुम प्रस्थान गरिसकेका छन् ।
