बागलुङ । बागलुङको बडिगाड गाउँपालिका वडा नं ७ स्थित इलाका प्रहरी कार्यालय भीमगिठेका वरिष्ठ नायव निरिक्षक (वरिष्ठ सई) उज्जवल पौडेलको हत्यामा संलग्न रहेको आरोपमा प्रहरीले थप एक जनालाई पक्राउ गरेको छ ।
गत श्रावण ८ गते स्थानीय आशा होटल एण्ड खाजा घरमा होटल भित्रै मृत भेटिएका पौडेलको हत्यामा संलग्न रहेको भन्दै प्रहरीले थप एक जनालाई पक्राउ गरेको हो ।
जिल्ला प्रहरी कार्यालय बागलुङका प्रहरी नायव उपरीक्षक एवम् सूचना अधिकारी मदन केसीका अनुसार बडिगाड गाउँपालिका ६ का १९ वर्षीय विशाल सुनारलाई पक्राउ गरिएको हो ।
होटलमा मृत फेला परेका पौडेलको हत्या भएको प्रारम्भिक अनुसन्धानपछि प्रहरीले यसअगाडी नै होटल सञ्चालिका आशा कुँवर र उनका छोरा बिनोद कुँवरलाई पक्राउ गरी पुर्पक्षका लागि कारागार चलान गरिसकेको छ ।
इन्चार्ज समेत रहेका पौडेल साउन ८ गते होटलमा मृत फेला परेका थिए । उनले घाँटीमा लगाएको सुनको सिक्रीसमेत लुटेर लुकाएको अनुसन्धानबाट खुलेको थियो ।
(अभियुक्तको नामपछि सुुनार हुनुपर्नेमा सुनुवार भएकोमा सच्चाइएको छ- सम्पादक)
