काठमाडौं । अविरल वर्षाका कारण सिन्धुपाल्चोक, हेलम्बु गाउँपालिका- ४ ग्याल्थुममा रहेको सरस्वती माध्यमिक विद्यालयको भवन खोलाले बगाएको छ।
सरस्वती मावि शुक्रबार बिहानदेखि नै बाढीको उच्च जोखिममा थियो । बाढीले बिहानै विद्यालयको शौचालय र निर्माणाधीन भागको पिलर बगाएको थियो।
जोखिम उच्च भएपछि स्कुल बन्द गरी डेस्क, बेन्च लगायत सामान बिहानै जनप्रतिनिधि र प्रहरी मिलेर हटाइसकेका थिए।
दिनभरि मेलम्चीले कटान गरेपछि राति ८ बजेतिर भने स्कुलको तल्लो पट्टिको भवन मेलम्चीले बगेको हो। बाढीका कारण मेलम्ची हेलम्बु सडक ठाउँठाउँमा अवरूद्ध भएका छन् । मेलम्चीको बहाव कम नभएकाले सबैलाई सतर्क रहन वडाध्यक्ष बुद्धिमान तामाङले आग्रह गरेका छन्।
मेलम्चीको बाढीले हेलम्बु गाउँपालिका ४ ग्याल्थुमका चार घर पनि उच्च जोखिममा परेका छन्।
शुक्रबार बिहानैदेखि मेलम्चीले कटान सुरू गरेपछि भरतबहादुर कार्की, मुक्तिनाथ लामिछाने, छविरमन लामिछाने र सुरेश तामाङका घर उच्च जोखिममा परेको वडाध्यक्ष तामाङले जानकारी दिए। -फाइल तस्बिर
