बर्दिया । बर्दियामा धारिलो हतियार प्रहार गरी श्रीमतीको हत्या गरेको आरोपमा बढैयाताल गाउँपालिका– १ सानो डाँफेका ५० वर्षीय कृपाल सुनार पक्राउ परेका छन् । उनले आफ्नै ४० वर्षीया श्रीमती केशकुमारी विकको हत्या गरेको प्रहरीले जनाएको छ ।
बिहीबार दिउँसो २ बजेको समयमा घरदेखि करिब पाँच सय मिटर टाढा जुहारीलाल एरीको धानखेतमा घाँस काटिरहेको समयमा श्रीमान् सुनारले केशकुमारीलाई धारिलो हतियार प्रहार गरेका थिए । सुरुमा धारिलो हतियार प्रयोग गरेर घाइते बनाएको र खेतमा भएको पानीमा श्रीमतीको टाउको थिचेर हत्या गरेको जिल्ला प्रहरी कार्यालयका प्रहरी नायब उपरीक्षक हिक्मतबहादुर बोहोराले जानकारी दिए ।
घटनाको कारण भने अझै खुल्न नसकेको प्रहरीले जनाएको छ । श्रीमान् सुनारलाई नियन्त्रणमा लिई थप अनुसन्धान जारी राखिएको प्रहरीले जनाएको छ । मृतकको शव पोस्टमार्टमका लागि बर्दिया अस्पतालमा राखिएको छ ।
