काठमाडौं । प्रतिनिधिसभामा जारी अवरोध हटाउनेबारे सभामुखसहित प्रमुख ३ दलका शीर्ष नेताको बैठक बालुवाटारमा सुरू भएको छ । सोमवार सिंहदरबार र संसद् भवन बानेश्वरमा दुई चरणमा बसेको बैठकमा सहमति जुट्न नसकेपछि मंगलवार प्रधानमन्त्री निवास बालुवाटारमा पुनस् छलफल शुरू भएको प्रधानमन्त्रीको सचिवालयले जनाएको छ । छलफलमा प्रधानमन्त्री पुष्पकमल दाहाल प्रचण्ड, सभामुख देवराज घिमिरे, कांग्रेस सभापति शेरबहादुर देउवा र एमाले अध्यक्ष केपी शर्मा ओली तथा तीनै दलका प्रमुख सचेतकहरू उपस्थित छन् ।
प्रमुख सचेतक तहको छलफलबाट संसद्को गतिरोध नहटेपछि शीर्ष नेताहरू नै दुई दिनदेखि छलफलमा जुटेका हुन् । त्रिभुवन विमानस्थल बाहिरबाट समातिएको झण्डै एक क्विन्टल सुन सम्बन्धमा उच्चस्तरीय छानबिन समिति गठनको माग गर्दै एमालेले साउन १० गतेदेखि संसद् बैठक अवरुद्ध गरेको छ ।
सरकारले भने राज्यका निकायबाट भइरहेको छानबिनलाई निष्कर्षमा पुग्न दिनुपर्ने बताउँदै आएको छ । प्रतिपक्षको मागमा सत्तापक्ष सहमत हुन नसक्दा संसदमा गतिरोध उत्पन्न भएको हो । एमालेको अवरोधका कारण पटक–पटक सूचनामार्फत स्थगित गरिएको प्रतिनिधिसभा बैठक मंगलवार दिउँसो ३ बजेका लागि राखिएको छ ।
