काठमाडौं । जारी प्रतियोगितामा नेपाली ब्याटर सर्ट बलको शिकार बनिरहेका छन्। आजको खेलमा पनि सर्ट बलमै नेपालले पहिलो विकेट गुमाएको छ।
क्रेग योङको पहिलो ओभरको पहिलो बलमै संयम गुमाउँदा कुशल भुर्तेल आउट भए। त्यसअघि क्रेगले पहिलो बल वाइड फालेका थिए। नेपालले आठौँ ओभरको पहिलो बलमा २७ रनको स्थितिमा पहिलो विकेट गुमाएको हो।
स्ट्राइक बलरहरु बेरी म्याककर्थी र मार्क एड्यरविरुद्ध सम्हालिएर खेलिरहेका कुशलले क्रेग बलिङमा आउने बित्तिकै संयम गुमाएर सर्ट बलमा प्रहार गर्न खोज्दा विकेट किपरको हातबाट समातिए। आयरल्यान्डले सुरुदेखि नै कसिलो र प्रभावकारी बलिङ गरिरहेका छन्। उनीहरुले लगातारजसो नेपाली ब्याटरलाई बिट गरिरहेका छन्।
