काठमाडौं । प्रधानमन्त्री पुष्पकमल दाहाल प्रचण्डले सत्ता स्वार्थकै लागि भ्रष्टाचारीलाई कुनै पनि हालतमा उन्मुक्ति नदिने बताएका छन् । प्रेस सेन्टर नेपालका पदाधिकारीसहितको टोलीले बुधबार बिहान बालुवाटारमा ध्यानाकर्षण पत्र बुझाउने कार्यक्रममा प्रधानमन्त्री प्रचण्डले भ्रष्टाचारीलाई कुनै पनि हालतमा नछाड्ने बताएका हुन् ।
‘कतै सत्तारुढ दल सरकार टिकाइ राख्नका लागि भ्रष्टाचारीलाई उन्मुक्ति दिने हो कि भन्ने भ्रम सृजना भइरहेको छ । हामी सत्ता स्वार्थकै लागि उन्मुक्ति दिने पक्षमा छैनौँ । बरु सरकार छोड्न परे पनि परोस् । भ्रष्टाचार र सुशासन विरुद्धका हाम्रो अभियान जारी रहन्छ । यसमा कसैले शंका नगरे हुन्छ,’ प्रधानमन्त्री प्रचण्डले भने ।
उनले सरकारले गरेका राम्रा काम देखेर प्रमुख प्रतिपक्षलगायत नयाँ भनिएका दलहरूलाई अपाच्य भएको पनि टिप्पणी गरे । उनले सदनदेखि सडकसम्म भ्रम सृजना गर्ने काम गरिरहेको र यसले उनीहरू नांगिदै जाने पनि बताए ।
‘प्रमुख प्रतिपक्ष दल लगायतका नयाँ भनिएका दलले सरकारले राम्रो काम गर्यो भनेर हाम्राविरुद्ध सदनदेखि सडकसम्म अवरुद्ध सृजना गरिरहेका छन् । तर, उनीहरू सदनदेखि सडकसम्म नांगिदै गएका छन्,’ प्रधानमन्त्री प्रचण्डले भने, ‘हामीले राम्रो काम गर्दा भ्रष्टाचार र सुशासनका देखावटी नारा लगाउने नयाँ दलका मुद्दा पनि खोपिएका छन् ।’
उनले आफ्नो भारत भ्रमण अहिलेसम्मकै सबैभन्दा उत्कृष्ट र फलदायी भएको पनि दाबी पनि गरे ।
