बागलुङ । बागलुङको बडिगाड गाउँपालिका ७ माझखर्कमा गोरु काटिरहेका बेला प्रहरीले ९ जनालाई पक्राउ गरेको छ । गएराति माझखर्कस्थित छविलाल पुनको खाली गोठमा दुई वटा गोरु काटिरहेको बेला इलाका प्रहरी कार्यालय बुर्तिबाङले ९ जनालाई पक्राउ गरिएको प्रहरीले जनाएको छ ।
प्रहरीले ९ जना सहित गोरु काट्न प्रयोग गरिएको हातहतियार र ७० केजी मासु बरामद गरेको जिल्ला प्रहरी कार्यालय बागलुङका सूचना अधिकारी तथा प्रहरी नायव उपरीक्षक मदन केसीले जानकारी दिए ।
पक्राउ पर्नेमा बडिगाड गाउँपालिका–७ माझखर्क निवासी उत्तम बुढामगर, देवबहादुर बुढामगर, शेरबहादुर बुढामगर, तेजबहादुर बुढामगर, गिरबहादुर बुढामगर, हिमालबुढा मगर, गिरप्रसाद बुढा मगर, मनबहादुर बुढामगर र मानसिंह बुढामगर रहेका छन् ।
प्रहरीले घटनास्थलबाट ७० केजी गोरुको मासु, बन्चरो एक थान, चक्कु दुई थान, हसिया तीन थान र दुई वटा गोरुको टाउँको बरामद गरेको छ । पक्राउ परेका उनीहरुमाथि थप अनुसन्धान भइरहेको प्रहरीले जनाएको छ ।
