बागलुङ । ढोरपाटन नगरपालिकाका मेयर देवुकमार नेपालीविरुद्ध जिल्ला प्रहरी कार्यालय बागलुङमा जाहेरी दर्ता भएको छ । इमेज बचत तथा ऋण सहकारीमा बचत गरेको रकम फिता नपाएपछि बचतकर्ताले सहकारीका संस्थापक अध्यक्षसमेत रहेका नेपालीविरुद्ध जाहेरी दिएका हुन् । नेपाली जेठ ५ गतेदेखि फरार रहेका छन् ।
जिल्ला प्रहरी कार्यालय बागलुङका एसपी योगेशकुमार खड्काका अनुसार ३७ जनाले आवश्यक प्रमाणसहित मंगलबार जाहेरी दर्ता गरेका हुन् । मंगलबारदेखि जाहेरी लिन शुरु गरेको र जाहेरीपछि थप अनुसन्धानको प्रक्रिया अगाडी बढाउने एसपी खड्काको भनाइ छ ।
