सिन्धुली । सुनकोशीमा शुक्रबार दुर्घटना भएको जिप र त्यसमा सवार प्राविधिक शिक्षा तथा व्यावसायिक तालिम परिषद् (सीटीईभीटी) का अधिकारीहरूको खोजी आज पनि जारी छ ।
शनिबार बिहानैदेखि खोजी जारी भए पनि हालसम्म मानिस र गाडी भेटिएको छैन । यद्यपि दुर्घटनास्थलबाट १५ मिटरजति तल सुनकोशी नदीमा खोजीको क्रममा पानीमुनि फलामको हुक अड्किएको हुनाले जिपमा अड्किएको आशंका गरिएको छ ।
शुक्रबार दिनभर खोजी गर्दा नभेटिएपछि शनिबार पनि दिनभर खोजी भइरहेको छ । खोताखोरसहित नेपाल प्रहरी, सशस्त्र प्रहरी, सेना र स्थानीयहरूले खोजी गरिरहे पनि भेटिएको छैन । नदीमा पानीको बहाब बढी भएकाले पानीलाई स्काभेटरको सहायताले अन्यत्र मोडेर खोजी गर्ने तयारी भएको छ ।
प्राविधिक शिक्षा तथा व्यावसायिक तालिम परिषद् (सीटीईभीटी) का दुई निर्देशक र अधिकृत चढेको बा १ झ ७४६७ नम्बरको जिप शुक्रबार दिउँसो मध्यपहाडी लोकमार्गको खुर्कोट–घुर्मी खण्डअन्तर्गत गोलन्जोर गाउँपालिका–७ को लौकुनबाट सुनकोशी नदीमा खसेको थियो ।
