काठमाडौं । काठमाडौं जिल्ला अदालतले कपनमा भाँडा पसल सञ्चालन गर्ने नीरा आचार्यको हत्याका आरोपी विनोद विश्वकर्मालाई पुर्पक्षका लागि थुनामा पठाउने आदेश दिएको छ । अदालतका न्यायाधिश चन्द्रप्रकाश तिवारीले शुक्रबार थुनछेक आदेश गर्दै विश्वकर्मालाई थुनामा पठाउने आदेश दिएका हुन् ।
सरकारी वकिलको कार्यालयले विनोदविरुद्ध आजीवन कैदमा राख्न माग गर्दै बुधबार अभियोग पत्र दर्ता गरेको थियो । अदालतले यो घटनामा विनोदले हत्यापछि लुटेको सिक्री किनेको आरोपमा पक्राउ परेका प्रदिप गदाइलीलाई धरौटीमा छाड्ने आदेश दिएको छ ।
गत वैशाख ७ गते नीरा आचार्य आफ्नै भाँडा पसलभित्र गम्भीर घाइते अवस्थामा भेटिएकी थिइन् । उनको उपचारका क्रममा त्यही दिन निधन भएको थियो ।
घटनाको ९ दिनपछि प्रहरीले झापाबाट ३६ वर्षीय विनोदलाई पक्राउ गरेको थियो । विनोदले आफू आर्थिक संकटमा रहेका कारण बाटोमा हिँड्दै गर्दा पसलभित्र एक्ली महिलालाई देखेकाले लुटपाट गर्ने उदेश्यले नीराको हत्या गरेको बयान सरकारी वकिललाई दिएका थिए ।
