काठमाडौं । सत्ता गठबन्धनको बैठकले बिहीबार बेलुकीसम्म मन्त्रिपरिषदलाई पूर्णता दिने निर्णय गरेका छन् ।
आज अपराह्न बालुवाटारमा बसेको गठबन्धन बैठकले मन्त्रालय भागबन्डामा लगभग सहमति गरेका छन् । तर कुन दलले कुन मन्त्रालय लिने अझै टुंगो लागिसकेको छैन।
बैठकमा सहभागी जसपा वरिष्ठ नेता राजेन्द्र श्रेष्ठले बिहीबार बेलुकीसम्म मन्त्रिपरिषदले पूर्णता पाउने पत्रकारहरूलाई बताए ।
‘मन्त्रालय भागबन्डा लगभग टुंगिएको छ। भोलि बेलुकीसम्म मन्त्रिपरिषद बिस्तार हुन्छ,’ श्रेष्ठले भने, ‘राष्ट्रिय जनमोर्चाबाहेक ९ दल सरकारमा सहभागी हुन्छन् ।’
दलहरूले प्रधानमन्त्री पुष्पकमल दाहाल प्रचण्डलाई मन्त्रीहरूको नाम बुझाउनेसमेत सहमति भएको छ । प्रधानमन्त्री दाहालले फेरि एक पटक सत्ता गठबन्धनका दलका नेताहरूसँग कुराकानी गरेपछि बिहीबार नयाँ मन्त्रीहरूको शपथ हुने पनि श्रेष्ठले बताए।
नेपाली कांग्रेसले ८ मन्त्रालय पाउनेबारे कुराकानी भएको छ। तर कुन कुन मन्त्रालय भन्ने टुंगिएको छैन। यस्तै माओवादीले ५, जसपा र एकीकृत समाजवादीले २- २, अन्य दलले एक/ एक मन्त्रालय पाउने लगभग सहमति भएको स्रोतको भनाइ छ।
