काठमाडौं । जुड बेलिंघमले अतिरिक्त समयमा निर्णायक गोलसहित दुईपटक जाली चुमाएपछि इंग्ल्याण्डले नर्वेलाई २–१ ले पराजित गर्दै फिफा विश्वकप २०२६ को सेमिफाइनलमा स्थान सुरक्षित गरेको छ।
मियामी स्टेडियममा आइतबार बिहान सम्पन्न क्वार्टरफाइनल भिडन्तमा सुरुआती गोलले अघि रहेको नर्वेमाथि इंग्ल्याण्डले शानदार पुनरागमन गर्दै अन्तिम चारमा आफ्नो स्थान पक्का गर्यो। पहिलोपटक विश्वकपको क्वार्टरफाइनल पुगेको नर्वेले अग्रता जोगाउन नसक्दा प्रतियोगिताबाट बाहिरिन बाध्य भयो।
खेलको ३६औं मिनेटमा एन्ड्रियास स्केल्डरअपले गोल गर्दै नर्वेलाई अग्रता दिलाएका थिए। तर पहिलो हाफको इन्जुरी समयमा बेलिंघमले उत्कृष्ट फिनिसिङ गर्दै खेललाई १–१ को बराबरीमा पुर्याए।
दोस्रो हाफमा दुवै टोलीले गोल गर्ने अवसर सिर्जना गरे पनि सफलता हात पार्न सकेनन् । निर्धारित ९० मिनेट बराबरीमा सकिएपछि खेल अतिरिक्त समयमा प्रवेश गरेको थियो।
अतिरिक्त समयको तेस्रो मिनेटमा बेलिंघमले व्यक्तिगत दोस्रो तथा टोलीका लागि निर्णायक गोल गर्दै इंग्ल्याण्डलाई २–१ को अग्रता दिलाए। त्यसपछि नर्वेले बराबरी गर्ने प्रयास गरे पनि इंग्ल्यान्डको रक्षापंक्तिले चुनौतीलाई सफलतापूर्वक रोक्यो। यस जितसँगै इंग्ल्याण्ड विश्वकप इतिहासमा चौथोपटक सेमिफाइनलमा पुगेको छ।
